Pertsona guztientzako gunea
Liburutegiak espazio irekiak, inklusiboak eta doakoak dira, jende oro hartzen dutenak haien adina, jatorria edo egoera pertsonala kontuan hartu gabe. Bertan pertsona askok, kulturarako atea ez ezik, gizartearen parte sentitzeko aukera ere aurkitzen dute.
Helduentzako alfabetatze-eskoletatik hasi eta desgaitasunen bat duten pertsonentzako tailer edo zerbitzuetaraino, liburutegiak gizarteratzeko funtsezko puntu bihurtu dira.
Irakurtzeko eta ikasteko haziak
Gazte-gaztetatik, liburutegiek ipuin-kontalarien, haur-irakurleen kluben, familia-jardueren eta hezkuntza-proposamenen bidez irakurzaletasuna sustatzen dute, irudimena eta liburuekiko maitasuna piztuz.
Bizitzan zehar, ikasteko jakin-mina eta nahia bizirik mantentzen laguntzen duten baliabideak eta programak eskaintzen dituzte, ikastaro, tailer edo, besterik gabe, ikasteko espazio lasai bat erraztuz.
Oztoporik gabeko kultura
Liburutegien balio handienetako bat kulturara doan sartzeko aukera ematen dutela da. Erakusketak, hitzaldiak, proiekzioak edo egileekin topaketak dira, besteak beste, programazioa betetzen duten jardueretako batzuk.
Topaguneak eta elkarbizitza
Gero eta digitalagoa eta azkarragoa den mundu honetan, liburutegiak dira, oraindik ere, kontsumitu beharrik gabe bertan egon daitekeen espazio publiko bakanetako bat. Irakurri, lan egin, ikasi edo, besterik gabe, beste pertsona batzuekin denbora pixka bat partekatzeko lekuak dira. Espazio seguruak, elkarbizitza erraztu eta komunitate-loturak indartzen dituztenak.
Komunitateari konektatutako etorkizuna
Liburutegiek garai berrietara egokitzen jakin dute. Gaur egun, elkarrekin bizi dira paperezko liburuak eta liburu elektronikoak, areto isilak eta gune dinamikoak, jarduera tradizionalak eta proposamen berritzaileak. Baina, ororen gainetik, pertsonengandik hurbil mantentzen jakin dute, haien beharrei erantzunez eta haien ondoan eraldatuz.
Liburutegi bat, funtsean, komunitate bat delako. Uda honetan, liburu berriak aurkitzeaz gain, zure liburutegi hurbilena berraurkitzera gonbidatzen zaitugu. Izan ere, apalategi bakoitzaren atzean, aukeren mundu bat dago zure zain.
